70 Persén Pisang Sané Kabuatang ring Bali Kanggé Upakara 

SIOSAN ring punyan kelapa utawi nyuh, tetanduran sané gumanti mabuat pisan ring Bali wantah biu utawi pisang. Duaning, sakancan upakara utawi bebantenané ring Bali pastika pacang muatang pisang. Nénten ja buahnyané kémanten, taler daun sané kantun nguda, kraras (daun sané sampun tuh), ngantos pusuhnyané.

Nyoman Tirta, sinalih tunggil krama saking Klungkung maosang pisang punika gumanti wantah srana utama ri kala ngaryanin banten. Sakancan bebantenané pastika pacang nganggén pisang pinaka srana. Napiké abulih, napiké aijeng.

“Ri kala matetumbasan srana banten, pisang patut katumbas kapertama. Duaning nika sané gumanti paling utama,” baos Nyoman Tirtha.

Guru Besar Pertanian, Fakultas Pertanian, Univérsitas Udayana (Unud), Prof. Dr. Ir. Dewa Ngurah Suprapta, M.Sc., maosang pisang sané kabuatang nyabran warsa ring Bali sawatara 30.000 ngantos 40.000 ton. Soang-soang kramané ring Bali katarka muatang pisang sawatara 34 kg nyabran warsa.

“70 persén saking akéh pisang sané kabuatang punika wantah kanggé ring upakara utawi madué fungsi sosial-religius. Wantah 30 persén kémanten pisang sané kabuatang gumanti pacang kajeng,” baos Déwa Suprapta.

Produksi pisang ring Bali sujatinné sampun sedeng yaning imbayang ring akéh pisang sané kabuatang. Manut Déwa Suprapta, produksi pisang ring Bali sawatara 130.000 ngantos 150.000 ton awarsa. Sakéwanten, keperluan pisang ring Bali ngamasa utawi musiman. Nika mawinan, ri kala Galungan utawi rerainan jagat sané siosan, Bali kantun kirangan pisang. Pamuputné patut ngrauhang pisang saking Jawi.

“Ri kala Galungan pastika i raga nénten prasida pacang ngraga nagingin akéh pisang sané kabuatang ring Bali,” baos Déwa Suprapta.

Sakéwanten, makéh para janané sané gumanti ngulati pisang sané majanten wantah saking Bali. Napi malih Bali taler madué makudang-kudang pisang sané gumanti metu saking tanah Bali.

Déwa Suprapta maosang wau manggihin sawatara 60 soroh pisang Bali. Ring Indonésia katarka wénten lintangan ring 300 sorohan pisang.

Pisang Bali, manut Déwa Suprapta, gumanti pinaka pisang unggul utawi utama. Duaning, pisang Bali punika madué rasa sané jaen pisan. Dumun, pisang Bali punika kanggé pinaka ajengan anaké alit sané kantun barak.

“Ngantos mangkin kantun makéh wénten para janané ring Bali, utamané ring désa-désa sané ngicén pisang pinaka ajengan majeng ring anak alitnyané sané kantun barak,” baos Déwa Suprapta.

Nanging, manut Déwa Suprapta utsaha nandur pisang ring Bali durung dados utsaha agribisnis sané gumanti katelebin pisan. Pisang kantun kanggé tetanduran sakéwala wénten kémanten. Para petaniné ring Bali durung jangkep uning ring saurah-arih utsaha agribisnis pisang. Yadiastun utsaha agribisnis pisang yaning katelebin gumanti prasida becik panglimbaknyané.

“Makéh sané tan rungu ring punyan pisangnyané sané wénten ring tegal. Punyan pisangé punika nénten kapiara. Nika mawinan raris metu wénten mrana makadi layu pisang. Niki gumanti wantah alangan utawi kapiambeng ri kala pacang nglimbakang tetanduran pisang ring Bali,” baos Déwa Suprapta.

Nika mawinan Déwa Suprapta mapangapti mangda para petaniné ngamargiang téknik budidaya pisang sané séhat. Téknik budidaya punika minakadi sanitasi, penjarangan panak pisang, ngabasin, ngrabuk, ngicén toya miwah sané siosan.  (aya)