Sura
Nglanglang Buana antuk Tari Kontémporér
Sampun makudang-kudang tari kontémporér sané karagrag olih I
Myoman Sura, S.Sn. tamatan saking Jurusan Tari STSI (mangkin
ISI) Dénpasar warsa 1996 puniki. Majalaran tari kontémporér,
anak lanang puniki suksés nyinahang raga ring jagat
internasional. Nénten kirang saking kutus panegara sampun
karauhin olih Sura –sesapan anak lanang sané embas ring
Dénpasar, 10 April sané ngarahsiang taunnyané. Panegara sané
sampun katandangin minakadi Swis, Jerman, Malaysia, Singapur,
Jepang, Hongkong, lan Afrika. Makudang panegara punika lebihan
ring apisan katandangin.
“Akéh sané tan percaya tiang saking Bali. Biasannyané sané
kauningin nak Bali wantah uning ngigel Bali. Napi malih tiang
ten magoba miwah makulit sada selem. Kasuén-suén raris
kauningin,” sapunika dosén Jurusan Tari ISI Dénpasar puniki
ngraos saha kenyem.
Suksés sané sampun kapolihin olih Sura amangkinan, nénten
dangan antuka molihang. Dané patut mautsaha giet lan naenin
bah bangun ring widang tari kontémporér puniki. Sadurungné
akéh sané nénten cumpu antuk kaputusan Sura nglakonin tari
kontémporér puniki. Piambeng punika sané raris ngawinang Sura
jengah nglakonang sané pinih becik. Dané raris makayunan
mangda prasida nyinahang raga ring widang punika. Sakéwanten
nyinahang raga sakadi punika nénten ja dangan. Masa-masa sané
ngawinang sedih akéh nibénin Sura. Silih tunggilnyané ri kala
dané katulak nyarengin sesolahan miwah masolah. Alon-alon
Lomba Cipta Karya dan Gerak (LCKG) sané kaprakarsain
olih Fakultas Ékonomi Unud, nyumbungin wastannyané. Napimalih
antuk pikolih SMAN 3 Dénpasar sané kaasuh olih Sura, pinaka
langganan juara LCKG.
“Sampun akéh tari kontémporér sané ciptayang titiang. Tari
kontémporér sané kasolahang ring puncak acara ulang tahun Bali
TV ring panggung Arda Candra, Taman Budaya wau-wau puniki
ciptaan titiang,” baos Sura.
Pemain film layar lébar “Opera Jakarta” sané kasutradarain
olih Garin Nugroho puniki mapiteket, yaning kayun sinah ring
jalur seni, patut nyinahang “idéntiras diri” antuk warna sané
matiosan. Sakéwanten punika nénten dangan. Mabuat sayaga ring
méntal lan kukuh ring sané katuju.
Alumnus SMEA Negeri Dénpasar puniki taler seneng pisan ring
silih tunggil pakaryan dané sané majudul “Bulan Mati”. Tari
kontémporér manut Sura sampun dados jagat senin dané. Dané
marasa mahardika masolah nyolahang raga. Taler antuk tata rias
miwah tata busana sané karandang ngraga. (ast)
